Nangako ang Japan na magbibigay ng $10 bilyon o katumbas ng humigit-kumulang ₱600 bilyon upang tulungan ang mga bansang Asyano—lalo na sa Southeast Asia—na matiyak ang suplay ng enerhiya kabilang ang crude oil, kasunod ng krisis na dulot ng digmaan sa Iran.
Inanunsyo ni Japanese Prime Minister Sanae Takaichi ang nasabing hakbang matapos ang isang online meeting kasama ang iba pang lider ng Asya. Layunin ng bagong cooperation framework na palakasin ang access ng mga bansa sa rehiyon sa petroleum products, mapanatili ang matatag na supply chains, at madagdagan ang kanilang oil stockpiles.
Ayon kay Takaichi, umaasa ang Japan sa Southeast Asia para sa petroleum-derived products, kabilang ang mga ginagamit sa medical equipment, kaya mahalaga ang matibay na ugnayan sa pagitan ng mga bansa sa rehiyon.
Sinabi rin ng foreign ministry ng Japan na ang $10-bilyong tulong pinansyal ay halos katumbas ng isang taong crude oil imports ng mga bansang kasapi ng Association of Southeast Asian Nations (ASEAN).
Tinanggap naman ng mga lider mula sa Pilipinas, Malaysia, Singapore, Thailand, Vietnam, Bangladesh, at South Korea ang inisyatiba. Popondohan ito sa pamamagitan ng iba’t ibang institusyon tulad ng Japan Bank for International Cooperation, Nippon Export and Investment Insurance, Japan International Cooperation Agency, at Asian Development Bank.
Sa naturang summit, nanawagan si Pangulong Ferdinand Marcos Jr. na muling buhayin ang fuel-sharing pact ng ASEAN. Binigyang-diin niya na walang bansang Asyano ang makakaiwas sa epekto ng supply chain disruptions kung kikilos nang mag-isa.
