Tinugutan kan korte sa Pasay na makapag-piyansa an dating TV host na si Jay Sonza katakod kan kaso na isinangat kontra saiya, makalihis na amyendaran an naenot na desisyon na non-bailable an saiyang kaso.
Segun sa saiyang abogado na si Atty. Mark Tolentino, binago kan Regional Trial Court Branch 118 Pasay City an nakaaging desisyon sa kaso na Unlawful Publication, kaya pwede nang magpyansa si Sonza. Ipoproseso suboot ninda tulos an piyansa huli ta sarado an korte kan iluwas an orden.
Magigirumduman na nadakop si Sonza sa saiyang harong sa Quezon City kan nakaaging Huwebes kan mga operatiba kan National Bureau of Investigation (NBI) basado sa ipinaluwas na warrant kan nasambitan ng korte. Ini sa primero pigkonsiderar na non-bailable offense.
Si Sonza napapaatubang sa mga kasong may relasyon sa cybercrime, kabali an Ilegal na Paggamit nin mga Paagi nin Publikasyon asin Ilegal na mga Pagtaram sa irarom kan Artikulo 154 kan Revised Penal Code, kasabay kan Seksyon 6 kan Cybercrime Prevention Act of 2012.
Basado sa imbestigasyon kan NBI Cybercrime Division kan Enero 2026, kabali suboot si Sonza sa mga nagpalakop nin dae beripikadong impormasyon asin nakakaraot na impormasyon dapit sa salud ni Pang. Ferdinand Marcos Jr., kabale na an suboot resulta kan CT scan na naglakop sa social media.
Pigpaliwanag kan kampo ni Sonza na bailable an kaso poon pa sa kapinunan komo sarong deretso sa irarom kan ley. Inapod man ni Tolentino na “legal misstep” an mas naenot na pagluwas kan warrant na nagdedeklarar na non-bailable an kaso.
Sa presente, piglalaoman kan kampo ni Sonza an tulos kaining libertad makalihis na magpiyansa, mantang igwa pa sindang posibilidad na magsangat nin reklamo katakod kaini.
