Nagluluwas sa mga dokumentong iniluwas man United States Department of Justice na soboot nag-hire an yumaong sex offender na si Jeffrey Epstein nin sarong team na nakabase sa Pilipinas tanganing puraon asin takupan an mga negatibong impormasyon dapit sa saiya sa internet.
Basado ini sa mga dokumentong nakalap kan Estados Unidos, kaibahan na an mga email exchange ninda Epstein asin ni AI Seckel, na agom kan tugang ni Ghislaine Maxwell— an dating karelasyon asin primerong katuwang ni Epstein sa pangangalap nin mga menor de edad.
Si Maxwell an nahatulan kan taong-2021 katakod kan sex trafficking crimes ni Epstein.
Sa mga email, iniladawan ni Seckel an sarong organisadong kampanya tanganing itago an soboot mga krimen ni Epstein sa online research results. Kaibahan na digde an paggibo nin mga positibong link dapit ki Epstein.
Sa saro pang email kan nakalihis na Disyembre 10, 2010 sinaysay ni Seckel ki Epstein na nahali na soboot sa Google search suggestions an mga terminong “Jeffrey Epstein jail” asin “Jeffrey Epstein pedophile” na tinatrabaho soboot kan sarong Philippine-based team.
Sigun sa U.S. DOJ documents, nagkriar an grupo nin kadakol na websites asin web pages na nagpapahiling ki Epstein komo sarong philanthropist, nagpopondo kan mga project na igwang kinaaraman sa Science, asin maski sa Sports.
Napag-araman na an mga dahong ini, an pinagsurugpon-sugpon gamit an ribu-ribong links tanganing manipulahon an resulta kan mga search engine.
Inilahad pa ni Seckel na importante an pag-edit sa tala kan buhay ni Epstein sa Wikipedia page.
Sa sarong email kan nakalihis na Disyembre 16, 2010 sinaysya kaining “important victory” an pagkontrol sa laog kaini huli sa madalas ining nagluluwas sa search results sa internet.
Marurumdumang si Jeffrey Epstein an inarestar kan taong-2019 sa kasong sex trafficking asin pang-aabuso sa mga menor de edad sa US asin iba pang nasyon.
Ini nagadan mantang nakakulong sa New York jail kan parehong taon mantang pighahalat an saiyang paglilitis.
