Dagos-dagos an piggigibong pagprepar kan duwang kapulungan kan Kongreso para sa nakaambang impeachment trial laban ki Vice President Sara Duterte.
Ngunyan na aldaw, Marso 18, nagsagibo nin ocular inspection sa Senado an mga opisyal kan House of Representatives, sa pangengenot ni House Secretary Reginald Velasco tangani masuri an mga gagamiton para sa paglilitis.
Nakapwesto na man sa plenaryo kan Senado an witness stand kun saen enot nang ginamit sa impeachment trial ki dating Supreme Court Chief Justice Renato Corona.
Sinabi ni Velasco na maogma ini mahiling na an mga pasilidad na gagamiton para sa impeachment trial. Kahagadan ninda na magkaigwa nin duwang kwarto na gagamiton kan 11 prosecutors asin secretariat support group.
Mientrastanto, sinabi man ni Senate Secretary Renato Bantug, sa ngunyan ay mayo pang major expense o dakulang gastos na iniluluwas an Senado.
Apwera sa pag-refurnish kan in-house witness stand na ginamit ki Corona asin robes na susuluto kan mga senator-judge, mayo pang dakulang gastos na iniluluwas an halangkaw na kapulungan.
Katakod man sa makakatabang kan senado na mga abogado, sinabi ni bantug na may nakakaulay na sinda na matabang sa pagbilog nin rules asin procedures kan impeachment trial.
Pag abot man sa kolor kan robe na susuluton kan mga senator-judge, sinabi ni Bantug na igwa nin kulay kapareho sana sa ginamit kan nakalihis na nilitis si Corona.
Tulong senador na man soboot an nakapagpasukol kan robe asin target na matapos an pagsukol hasta sa masunod na semana.
Sa huri, sinabi kan secretaryo kan Senado na dagos-dagos an komunikasyon ninda sa saindang counterpart sa kamara para sa impeachment trial ki VP Sara.
