Nagsunad na an Kamara nin Motion for Reconsideration sa Korte Suprema na naghuhurot na baliktadon an desisyon na nagbasura sa impeachment case kontra ki Vice President Sara Duterte asin tugutan sinda na gampanan an ekslusibong mandato na usigon an sarong impeachable official asin an Senado na litison an kaso.
An mga dokumento kan apelar an pigsumiter kasuudma nin hapon kan Office of the Solicitor General sa paagi kan Philippine Judiciary Portal kun saen an kopya an pigtao kan House Prosecution panel.
Pigtawan duon ni Romualdez na dae pig-aangat kan Kamara an kapangyarihan kan Supreme Court.
Mawot sana soboot ninda na maipreserba an papel kan Kamara komo boses kan mga Pilipino sa proseso kan paghahanap nin hustisya asin panimbagon sa ley.
Piglinaw ni Romualdez na nakapalaman sa 1987 Konstitusyon na sulamenteng an Kamara sana an igwang eksklusibong kapangyarihan tanganing magpuon sa proseso nin mga kaso kan impeachment asin bako ining trabaho kan Korte Suprema.
Marurumduman kan nakalihis na Pebrero 5, 2025 pigsumiter na kan Kamara sa Senado an ikaapat na impeachment complaint na pig-indorso asin pigtintaan kan 215 na mga lehislador.
An ikaapat na impeachment an igwang bisa huli ta nakaabot pa ini sa House Committee on Justice mantang an naenot man na tolo an mayong pagbalgar sa 1 year bar rule siring kan pigsambit kan Supreme Court.
Marurumduman, sa 15 na mga mahistrado kan Supreme Court, 12 dito an mga appointees ni dating Presidente Rodrigo Duterte.
Pigpahayag man ni Romualdez na sa mga nakalihis na impeachment, an derechos kan paglilitis an sa Senado pigkukundusir asin mayong hurisdiksyon kontra digde an Korte Suprema na nag-imbento nin bagong panundunan na dae makatarungan.
