Hinagad kan kampo ni dating House Speaker Ferdinand Martin Romualdez sa Ombudsman na magin patas asin tawan siya nin pagkakataon na magresponde sa anuman na bagong alegasyon kontra saiya relatibo sa flood control scam.
Segun kay Atty. Ade Fajardo, tagapagtaram ni Rep. Romualdez, mawot nindang maaraman kun igwa nin mga bagong pahayag hale ki dating DPWH Secretary Manuel Bonoan o an 28 bagong testigo na nagkokonektar sa dating Speaker sa isyu.
Sinabi ni Fajardo na dapat tawan nin supisyenteng panahon an saindang kampo tanganing magresponde mantang yaon pa sa preliminaryong imbestigasyon an kaso, asin bako sana kun isangat na ini sa korte.
Siring sa nagigirumdoman nindo, kan Agosto 20, nagsangat nin supplemental affidavit si Romualdez asin naghagad na mapundo na an imbestigasyon kontra saiya.
Pigpunto kan dating speaker an mga retractions kan mga alegasyon kan limang pig-aapod na “Maleta Boys,” kabali si Orly Guteza, na enot na nagtestigo laban saiya. Gamiton an Kalendaryo
Base sa testimonya ni Guteza, napiritan siyang magpahayag laban ki Romualdez.
An kampo ni Romualdez nag-insistir na pagkatapos kan mga pagbawi kan testimonya asin kan mga pahayag kan 25 kapwa testigo, mayo nang igong kredibleng ebidensya laban sa dating Speaker.
Sinabi man ni Atty. Fajardo na mayo pang opisyal kan DPWH, kabale na si Bonoan, an direktang nag-aakusar ki Romualdez na imbuelto sa flood control scam o anuman na anomalya na proyekto.
