MAYO nin “defense strategy” an kampo ni Former President Rodrigo Duterte sa nagpapadagos na confirmation of charges hearing sa International Criminal Court (ICC) sa The Hague, Netherlands.
Sa entrevista kan Bombo Radyo Naga ki Atty. Michael Henry Yusingco, Political Analyst asin Senior Research Fellow sa Ateneo Policy Center, sinaysay kaini na pag yaon sa defense an sarong lado, limitado sana an pwede kaining gibuhon, mayong iba kundi an pahimutikan an mga alegasyon kan ibong na kampo asin kun pano papasaon an mga matitibay na argumento kan kalaban. Ini na an nahihihiling ni Yusingco na pagkukulang sa kampo kan dating pangulo.
Sigun sa opisyal, dae ini kumbinsido sa pinapahiling na performance kan team ni Duterte huli sa mabababaw an mga statement. Ini an dapat na mabago sa aldaw na an defense na an malatag kan saindang arguement.
Dugang pa ni Yusingco, kaipuhang eestabilisar kan kampo ni Duterte na mayong saysay o halaga an ebidensiyang tigpresentar kan prosekusyon asin kaipuhang mapatotoohan na ‘reasonable doubt an mga tigpresentar na ebidensiya kan defense team kan dating presidente tanganing magkaigwa nin pagdududa sa mga husgado an pinahiling kan prosecution team.
Kaipuhan pa soboot ni Duterte o kan saiyong lado na patotoohan na an war on drugs an sarong lehitimong programa na mawot sabihon kusa ining tinanggap kan taumbayan asin kusa ninda ining sinunod asin maikokosidera soboot na colateral damage an mga nagadan tanganing ma-aquit an dating presidente.
Pag abot naman sa mga video na pinahiling kan prosecution team, aminado si Yusingco na masakit soboot ining pahimutikan o depensaran, nin huli ta matibay asin magabat an ebidensiyang pig-presentar kan prosecution kan mga nakalihis na proceedings.
An sulamenteng paagi tanganing mapasa ini, an sabihon mismo ni FPRRD na nagsusuba sana man siya sa video. Pag abot naman sa pagbasol kan kampo ni FPRRD kay PBBM kun tano ini nakulong sa ICC, irrelevant soboot an argumento na ini maski pa totoo.
Siring man an paggamit sa bakong magayon na kamugtakan kan salud o paggurang kan dating paresidente asin an pag-question sa kredebilidad kan mga abogado kan mga biktima kan war on drugs an maikokonsiderang malamya asin maluyang argumento.
Pag abot naman sa existence ni FPRRD, dapat soboot yaon ini sa mismong trial tanganing makua mismo an saiyang panig asin matawan nin pagkakataon na pahimutikan an mga ginagapo saiyang alegasyon.
Sa ngunyan, hagad na sana kan opisyal, na mahiling an defense strategy sa kampo ni Duterte asin pagprepararan an pagpresentar kan saindang mga ebidensiya.
