NAGA CITY- Nagtitinir na nasa marhay na kamugtakan an sitwasyon kan Lake Buhi sa ibong kan huma na dara kan Bagyong Ada asin pagsabog kan Bulkang Mayon.
Sa entrevista kan Bombo Radyo Naga ki Jovenson Narra, Lake Development Designate kan LGU-Buhi, sinaysay kaini na normal an sitwasyon sa lugar alagad nagpepreparar naman an mga parasisira asin fish cage operators tanganing malikayan an mga darakulang problema sa mga masunod na aldaw.
Sigun pa ki Narra, saro sa saindang pigbabantayan an pagkakaigwa nin fish kill enkaso magtama an bagyo huli ta ini an kadalasan na nangyayari makalihis an kalamidad.
Dugang pa kan opisyal, igwang sampulong Barangay an nakapalibot sa Lake Buhi kun saen an mga ini an prone sa pagbaha asin pagrasay nin daga.
Huli digde, saro sa mahigot na pigpapautob kan lokal na gobierno iyo an force evacuation sa mga residente sa nasambitan ng Barangay.
Siringman tuyong igwang piglalaoman na bagyo pigtatakupan na an mga flooting fish cage asin an mga pwede nang i-harvest an pigkukua na tanganing malikayan na madanyaran o maraot.
Mientrastanto, pigsaysay pa ni Narra na dae man problema sa saindang lugar an pagsabog kan Bulkang Mayon huli ta mayo pa man na nairehistro na igwang dinarang dakulang problema an ashfall na gikan sa Bulkan.
Sa ngunyan, hagad na sana kaini na dae magsabay an Bagyo asin pagsabog kan Bulkan tanganing magtinir na salbado an mga tawo sa huma na dara kan mga ini.
