Nangangaipuhan an Commission on Elections (Comelec) nin pondo na maabot sa kantidad na P200 milyon ta nganing magkondusir nin special elections sa ikaapat na distrito nin Cavite.
Pigkumpirmar iyan ni Comelec chairman George Garcia katakod kan panuntunan na kaipuhan an sarong espesyal na pirilian ta nganing makahanap nin maribay kay dating Rep. Francisco “Kiko” Barzaga.
Si Barzaga pinatalsik kan Kamara de Representantes sa botong 265 pabor, 14 daing tugot, asin 8 abstain sa paagi kan Commitee Report No. 298 na ipinaluwas ni 4Ps Rep. JC Abalos nin huli sa suboot naging asal kan dating lehislador sa nagkapirang sesyon kaini.
Igwa nin 437,730 botante an ikaapat na distrito nin nasambitang probinsya.
Nanggana si Barzaga kan 2025 national and local elections sa botong 165,942 komo representante kan nasambitang distrito.
Marurumduman na enot nang nasabi kan Comelec na mahanap pa sindang pagkukuanan kan saindang pondo nin huli ta dai kabali ining pirilian sa natawan ninda nin preparasyon ngunyan na taon.
Mayo pa man nabubulgar an Comelec kun paano ninda makukua an kinakaipuhan na kwarta.
Ipigkokondusir an special elections ta nganing ribayan an sarong posisyong elektibo na nabakante nin huli sa pagkakahali sa ano man na legal na lakdang arog kan pagkakahali ni Barzaga komo kongresista o sa ano man na aplikableng rason arog kan kagadanan kan opisyal.
Enot nang nagkaigwa nin espesyal na pirilian sa ikaduwang distrito nin Antipolo ngunyan na taon kun sain nanggana si Philip Acop komo kongresista kan nasambitang lugar makalihis an kagadanan kan saiyang ama na si dating Cong. Romeo Acop kan Disyembre 2025.
