NAGA CITY- Piglinaw kan sarog abogado na dae dapat i-atras asin ipawarang bisa an kasong Bigamy kun naisunad na nin huli ta ini an sarong public crime.
Sa entrevista kan Bombo Radyo Naga ki Atty. April Aidearlin Carelo, Attorney-at-law kan sarong law office, sinaysay kaini na maikokonsiderar na krimen kun an sarong tawo an liwat nagpakasal maski pa an enot kaining kasal an legal na nag-iiral pa- lalaki man o babae asin maski pa sa ibang igwa nin otoridad na magkasal, mapakasal an duwa asin maski pa sa ibang nasyon nagpakasal.
Ini an nakapalaog sa Article 349 kan Revised Penal Code kan Pilipinas kun saen igwa ini nin kapadusahan nin pagkakakulong.
Sigun ki Carelo, maski pa dae nag-ibahan an mag-agom hasta legal pa ining kasal, laog pa ini sa Bigamy hasta mayo nin annulment na nangyayari.
Sa ibong kaini, an nasambitan ng ley an igwa man nin pigkokonsiderar siring na sana kan mga Muslim na lalaki na pigtutugotang magpakasal nin labi sa sarong agom o hasta apat na agom, hasta kaya kaining masimbagan an pangangaipohan kan saiyang mga agom.
Mientrastanto, an Bigamy o an pagpapakasal nin duwang bes mantang dae pa napapawarang bisa an enot na kasal an sarong krimen na pampubliko kun saen maski siisay na tawo na dae karelasyon an pwedeng magsunad o magfile kaini sa korte.
