Mayo nin man ano man na epekto sa nagpapadagos na impeachment trial ni Vice President Sara Duterte sa Senate Impeachment Court an kasong grave threats na kinakahampang kaini sa Quezon City Regional Trial Court, sigun yan ki Senate President Sherwin Gatchalian.
Sigun ki Gatchalian, magkasuway an duwang proseso huli ta an RTC an nagkakapot sa criminal case, mantang an Senado bilang Impeachment Court an nagtutukar sa impeachment case laban sa bise presidente.
Tinawan doon kan senador na an pagdeterminar kan Quezon City court na igwa nin probable cause laban ki Duterte dai nangangahulogan na napatunayan nang nagkasala ini o igwa nang pinal na desisyon an korte.
Sa impeachment trial, kinakaipuhan pa man an defense team ni Duterte na ipahiling an saindang mga ebidensiya antes magdesisyon an mga senador bilang impeachment judges.
Kan nakalihis na Hulyo, natapos na kan House prosecution panel an pagpresentar kan saindang kaso sa irarom kan Article IV kan impeachment complaint, na nag-aakusar ki Duterte nin culpable violation of the Constitution asin betrayal of public trust katakod kan alegasyon na grave threats laban kina Pangulong Ferdinand Marcos Jr., First Lady Liza Araneta-Marcos asin dating House Speaker Martin Romualdez.
Kan nakalihis na Biyernes, Setyembre 4, nagpaluwas nin arrest warrant an Quezon City court matapos ining manutaran na igwa nin probable cause para kasuhan si Duterte nin tolong (3)bilang kan grave threats.
Nag-ugat an kaso sa mga pampublikong pahayag ni Duterte kan 2024, kun sain sinabi niya na nag-hire siya nin assassin tanganing igadan sina Pangulong Marcos, an First Lady asin si Romualdez kun madagos an suboot planong paggadan sa saiya.
Nagpiyansa si Duterte nin P360,000 sa Quezon City RTC kan Sabado.
Kasunod kaini, nangangapodan si Gatchalian sa pulisya na seryoson na siyasaton an pahayag ni Duterte na nababahala ini para sa saiyang buhay.
Tinawan-doon kan Senate President na dapat magin salbado an gabos, kabali na an bise presidente.
