Pigkumpirmar kan self-confessed drug lord na si Kerwin Espinosa sa House Quad Committee na si dating PNP Chief asin ngunyan na Senator Ronald Dela Rosa an nag pressure sa saiya kan nakalihis na taong-2016 tanganing iduon sa Illegal drugs si dating Senator Leila De Lima asin an negosyanteng si Peter Lim.
Piggibo ni Kerwin an rebelasyon sa saiyang testimonya sa Quad Comm kun sain saiyang pig-istorya an pinag-agihan kan saiyang pamilya komo biktima man kan extra judicial killings sa irarom kan Duterte administration.
Pigbuyagyag man ni Espinosa na pigbantaan ini ni Dela Rosa na kun dae masunod mangyayari man saiya an nagyari sa saiyang ama o kun dae sa saro sa saiyang pamilya.
Magin an aktor na si Leyte Rep. Richard Gomez mawot man na iduon sa iligal na droga, alagad dae man kaini ginibo sa ibong kan pressure.
Marurumduman na ginadan kan nakalihis na taong-2016 an ama ni Kerwin na si dating Albuera Mayor Rolando Espinosa na imbwelto man sa illegal drug trade.
Soboot sa saiyang pagbwelta sa nasyon makalihis madakop sa Abu Dhabi, pigsabat ini ni Dela Rosa asin pig-akbayan pasiring sa lunadan asin kan nasa laog na soboot sinda kan lunadan pigsugo ini na akuon na imbwelto ini sa illegal drug trade sa nasyon asin iduon kaini sinda De Lima asin Lim.
Pitong taon nakulong si De Lima asin naabswelto sa gabos na akusasyon kontra saiya. Pigtukoy man kan dating Presidente Rodrigo Duterte si Peter Lim komo biggest drug dealers sa nasyon.
Pigsaysay man ni Espinosa na haloy na soboot nindang pighahalat an hustiya para sa saiyang ama na biktima kan extra judicial killing (EJK).
