“Depende sa sitwasyon alagad sa laog nin rasonableng panahon.”
Ini an paglilinaw kan Korte Suprema sa isyu kan “forthwith” siring sa nakasurat sa Konstitusyon may relasyon sa mga kaso nin impeachment.
Sinabi ini kan Korte Suprema makalihis na ibasura an petisyon para sa mandamus na isinangat ni Catalino Aldea Generillo Jr. na nagmamawot na atasan an Senado na tulos na mag-convene komo impeachment court asin dangugon an kaso ni Bise Presidente Sara Duterte
Alagad segun sa SC, dae pwedeng makiaram an judiciary sa mga aksyon kan Senado apwera sana kun igwa nin malinaw na grave abuse of discretion.
Tinawan duon kan Korte Suprema na dawa ngani may katalingkasan an Senado na magtalaan kan oras, dae man giraray dapat na maatraso tanganing mamantenir an prinsipyo nin accountability kan mga opisyales kan gobyerno.
Sa petisyon na isinangat katakod kan impeachment ni VP Sara, sinabi kan SC na naghiro an Senado sa laog nin rasonableng panahon.
Mientrastanto, pigdeklarar man na moot an petisyon kan magpoon na an preparasyon kan Senado para sa impeachment trial asin kan ma-nullify an Articles of Impeachment kontra ki Duterte sa mga nakaaging desisyon kan Korte Suprema.
