NAGA CITY- Nagpakol na sa labi 1-K na indibdwal an nakapagfile para sa isasagibong 2026 Civil Service Examination.
Sa entrevista kan Bombo Radyo Naga ki Maria Dolores Detera Salud, Director II, Civil Service Examination Camarines Sur field office, sinaysay kaini na nagpuon an filing kan nakalihis November 4 asin ini an pigkukundusir tolong aldaw sa sarong semana tuyong Martes, Miyerkules asin Huwebes sa sarong mall sa siyudad nin Naga puon alas 8 nin aga.
Sigun ki Salud, kada schedule piglalaom ninda an nasa 800 na indibidwal na ma-file para sa nasambitan ng eksaminasyon kun kaya preparado man soboot sinda na i-akomodar an mga ini.
Dugang pa kan opisyal, katabang ninda sa pag-assist sa mga tawo an lado kan Philippine National Police na kun saen enkaso mayong darang ID an ma-file pwede soboot magkua nin Police Clearance sa mga naka-standy na pulis.
Siringman yaon man an pigbugtak na photo booth para sa mga mangangaipuhan nin picture orog na ta strikto sinda sa sukol kan ID.
Mientrastanto, eksaktong 5-K na indibidwal sana an target kan Civil Service Commission Camarines Sur para sa mga kwalipikadong ma-take kan eksaminasyon kun saen dae na malampas sa November an filing kaini.
Para man sa mga dae makalaog online, posible na pano na an saindang quota para sa sarong aldaw kun kaya kaipuhan na purbaran sa masunod na semana.
Sa ngunyan, ikukundusir an 2026 Civil Service Examination sa Camarines Sur National High School asin sa Central Bicol State University of Agriculture.
