Pig-ebakwar kan mga otoridad an na sa labi 1,500 na mga residentes gikan sa hotel asin kaharongan sa Crete, Greece makalihis na magsiklab an marekas na paglakop kan wildfire sa parte kan isla, sigun sa report kan Greek fire brigade kasuodma, Huwebes, Hulyo 3, 2025.
Labi 230 bumbero an nagtarabangan tanganing maapula an kalayo na pig-aapod kan mga otoridad na ‘masakit’ na sitwasyon huli ta sarabay na nagsiklab an kalayo sa manlae-laen na lugar.
Sarong suhay na kasulo man an naikurit sa Halkidiki region, kun saen 160 bumbero asin 49 lunadan pang-emergency an presenteng nagresponde.
Nagpatanid man an fire service na an nasyon an malaog na sa ‘pinakama-peligrong bulan’ kan fire season, kun saen an makukusog na duros an orog pang nagpaparekas sa pagkuriyat kan kalayo.
Mientrastanto, naikurit man mga wildfire sa Germany, partikularmente na sa Saxony kun saen igwang duwang tawong irido asin labi 100 an pig-ebakwar.
Napag-araman na an naeeksperyensiyahang wildfire an kasabay kan padagos na matinding heatwave sa Europa, kun saen piglalaomang maabot sa mid-30s an temperatura sa mga nasyon siring kan Spain, Italy, Austria, Hungary, Slovakia, Poland, asin Croatia.
