Apektado an kabilogang 4,229 na pasahero makalihis na kanselaron an nagkapirang flights kasuodma, Hulyo 18 dara kan maraot na kamugtakan kan panahon na dara kan bagyong Crising.
Sigun sa Civil Aviation Authority of the Philippines (CAAP), 18 domestic flights an kinaselar mantang duwang flights man an na-divert man nakalihis na aldaw nin Huwebes, Hulyo 17.
Basado sa iniluwas na advisory kan ahensiya, kanselado an nagkapirang domestic flights sa pirang airlines companies partikularemte na an Cebu Pacific, igwang biyaheng Manila – San Jose vice versa, Manila – Virac asin vice versa, Manila – Tuguegarao asin vice versa asin Manila – Cauayan asin vice versa.
Sa ibang airline company (PAL Express), kanselado an flights gikan Busuanga- Manila, Manila – Cauyan asin vice versa siring man an Manila – Basco, Batanes asin vice versa, Clark – Basco asin vice versa.
Nagkanselar man nin flights an (Cebgo) biyaheng Cebu – Masbate asin vice versa, Manila – Naga asin vice versa.
Nakapagrehistro man an CAAP kan mga na-divert na flights kaibahan an biyahe gikan sa Manila-Busuanga na bweltada sa Manila huli sa raot kan panahon.
Pig-abisuhan man an mga pasaherong apektado kan mga nauktabang flights na makipag-koordinar sa mga airline company tanganing matabangan sinda sa rebooking kan saindang flight o refund kan saindang tickets.
