NAGA CITY- Nagin katuwang kan Commission on Elections sa banwaan kan Labo, Camarines Sur an mga kapulisan sa saindang pigkundusir na Oplan Baklas.
Sigun ki PLTCOL. Jim Jeremias, an COP kan Labo MPS, kasabay kan pagpuon kan kampanya para sa National post para sa 2025 National and Local Elections kadakol na mga campaign poster an saindang nanutaran na dae nagsusunod sa panundon na pigpaluwas kan Comelec.
Kabali na soboot digde an mga campaign poster na nakabugtak sa poste kan kuryente, puon kan kahoy asin an mga dae nagsusunod sa tamang sukol kan saindang poster.
Katakod kaini, papadarahan soboot kan Comelec nin notice an mga kandidato na may-sadiri kan campaign posters kun saen tatawan an mga ini nin tolong aldaw tanganing sinda na mismo an magbaklas kan saindang mga poster.
Enkaso dae man nagsunod, kakasuhan an kandidato nin election offense asin posibleng madiskwalipika sa eleksyon.
Huli kaini, pig-enkaminar soboot ninda an mga kandidato na magkusa na sana sa pagbabaklas nin campaign posters sa ipinagbabawal na lugar.
Pigsaysay pa kan opisyal na ginigibo ninda an Oplan Baklas tanganing masierto na nagsusunod an mga pulitiko sa tamang pagbugtak kan saindang mga campaign poster.
Sa ngunyan, hagad na sana kaini na magsunod an gabos na mga kandidato sa mga panundon na piglatag kan Comelec tanganing malikayan na mabugtak sa alanganin na sitwasyon.
