Nagtutubod si Senate President Pro Tempore Panfilo Lacson kan nakalihus na Sabado na an pagsuko sa Kalayaan Island Group (KIG) an dae naiiba sa pagsuko sa bilog na nasyon.
Sigun sa Senador, nakapalaman sa international law na an enot na nasyon o grupo na makadiskubre asin makakua nin kontrol sa kadagaan an puwede ining ihurot na sainda.
Paliwanag pa ni Lacson, natuklasan asin pig-ako kan lawyer asin adventurer na si Tomas Cloma an Spratly Islands sa irarom kan prinsipyong “res nullius”, kun saen siisay man na makatuklas asin makakubkob sa kadagaan an pigbistong maysadiri kaini. Alagad, pigsuko man ni Cloma an pagsasadiri kan nasambitan ng kadagaan sa gobierno kan Pilipinas.
An pahayag ni Lacson an kasimbagan sa kontrobersyal na nagin simbag ni Senador Rodante Maracoleta na isuko an Kalayaan Island Group sa China huli ta dae soboot ini sakop kan Exclusive Economic Zone (EEZ)kan Pilipinas.
Nilinaw naman ni Marcoleta na an saiyang pahayag an nasala sana nin pagkakaintindi.
Alagad para ki Lacson, an arbitral award sa West Philippine Sea an dae nagsasaklaw sa Kalayaan Island Group, na kinababalihan kan Pag-asa Island.
Mientrastanto, nagtutubod man si Senador erwin Tulfo na dae mapabor an mayorya kan mga Pilipino sa suhestiyon ni Marcoleta.
Pigsaysay man ni Palace Press Officer Atty. Claire Castro, malinaw an paninindugan ni Presidente Ferdinand Marcos Jr. na mayong isusuko maski kadikit na kadagaan sa West Philippine Sea.
