Aram baya nindo mga ka-bombo, sarong 33-anyos na truck driver sa UK an kinaipuhan nin emergency treatment makalihis na magkakan nin kadakol na gummies sa laog kan halipot na peryodo.
Binisto an lalaki na si Nathan Rimington, sarong truck driver gikan sa Yorkshire.
Susog sa report, ini soboot na nag-order nin nasa 3kg o 6.6 pounds nin container kan Haribo Cola Jelly gikan sa Amazon makalihis na mag-crave nin gummy candies.
Katakod digde, sinasabing kinakan kan lalaki an 10,461kcal na kantedad kan gummies sa laog nin tolong aldaw kun saen makalihis ini nakaeksperyensiya na nin
seryosong pisikal na sintomas.
Dinara ini sa ospital huli sa labing kulog kan tulak, pagganot o pagpapawis, high blood pressure, asin labing pagtarakig.
Makalihis an pigsagibong mga tests, si Rimington an na-diagnosed na igwang acute diverticulitis.
An Diverticulitis sarong condition kun saen an sadit na protrusions na pig-apod komo diverticula na nabibilog sa colon wall an nagkawsa nin infection o inflammation.
Sigun sa mga Medical experts an pagkunsumo nin dakol na kantedad kan nagkapirang ingredients siring kan gelatin an nagpapalangkaw sa peligro sa bowel movement asin intestinal obstruction.
Sa ngunyan, makalihis na magsairarom sa bulungan, nakarekober man an nasambitan ng lalaki asin nagpromesa sa sadiri na dae na papabayaan an saiyang salud.
