NAGA CITY- Padagos soboot an pagbilog nin mga programa kan komitiba sa agrikultura asin pagsisira sa banwaan nin Calabanga, Camarines Sur para sa karahayan kan nasambitan ng sektor.
Sa entrevista kan Bombo Radyo Naga ki Adonis Aguilar Jr, Municipal Councilor kan LGU-Calabanga, sinaysay kaini na padagos an saindang pag-enkaminar sa saindang mga local farmers asin fisherfolk na magparehistro tanganing magin ensured sa panahon kan kalamidad.
Sigun ki Aguilar, dakulang katabangan para sa mga paraoma asin parasisira na sinda an rehistrado sa Department of Agriculture asin local registry tanganing marekas na makakua nin tabang sa panahon kan pangangaipuhan.
Katakod kaini, igwa soboot ikukundusir na mobile registration para sa mga mawot na magparehistro na parasisira kan saindang mga baruto komo kasimbagan sa saindang kahagadan sa lokal na gobierno na irani an nasambitan ng pagpaparehistro.
Apwera digde, sa maabot man na bulan kan Pebrero, magkakaigwa nin LTO Mobile registration para sa mga igwang lunadan asin mawot magkua nin lesinsiya na kun saen libre an Theoretical driving course.
Para man sa lado kan senior citizen asin PWD, padagos soboot an LGU-Calabanga sa pagbilog nin mga programa na makakatabang sa saindang lado para sa ikakamarhay kan saindang sektor.
