NAGA CITY- Nakatalaan na magluwas nin kasuguan an alkalde kan siyudad nin Naga dapit sa pagkriar nin sarong team sa irarom kan City Environment and Natural Resources Office (City ENRO) na iyong nakatuka na mag-inspeksyon kan mga kondisyon kan mga puon nin kahoy sa mga tinampo kan siyudad.
Sigun ki Naga City Mayor Leni Robredo, an nasambitan ng lakdang an pig-aapod na proactive safety measure tanganing malikayan an mga aksidente na kina-iimbweltuhan kan mga gurang o may raot nang puon nin kahoy.
Katakod digde, pigsaysay kan opisyal na hahagadon man kan City Government an partisipasyon kan Department of Environment and Natural Resources sa joint inspection.
Kaipuhan soboot na masierto na an mga puon nin kahoy an salbado asin pusog pa tanganing malikayan na magkawsa nin peligro sa publiko.
An nasambitan pa na lakdang an kasunod kan nangyaring aksidente sa Ocampo, Camarines Sur kun saen an sarong gurang nang puon nin Acacia an natumba na ikinagadan kan magtugang.
Dugang pa ni Robredo na an nasambitan ng inspeksyon an tangaing maaaraman kun pwede pa bang i-preserba an puon nin kahoy o kaipuhan na ining halion.
Sa ngunyan, piglalaoman na tolos na mapuon an City ENRO kan roadside tree audit makalihis na maipaluwas an kasuguan dapit digde.
