Mas pinakusog pa kan manehamiento kan Libmanan Public Market an implementasyon kan mga protocols sa merkado asin slaughterhouse kasunod kan pagkumpirma kan African Swine Fever (ASF) sa sarong hog farm sa Barangay Labao, Libmanan. Ini para maibitaran an paglakop kan helang sa ibang barangay asin maprotehiran an mga parabakal, paratinda, asin paraataman nin orig.
Sa intrevista kan Bombo Radyo Naga ki Anton Palo – Market Admininistrator, Libmanan Public Market, sinaysay kaini na mas mahigot ngonian na pigbabantayan an paglaog kan mga buhay na orig asin produktong orig hale sa mga lugar na may kumpirmadong kaso nin ASF. An ibang mga paratinda nin carne dae na man nagbabakal sa mga apektadong lugar, mantang kaipuhan an katumbas na sertipikasyon hale sa barangay para sa mga orig na naglalaog sa slaughterhouse.
An inspeksyon kan karne bago asin pagkatapos kan pagbuno, kaiba an ante-mortem asin post-mortem na inspeksyon, pinakusog man. Regular man na piglilinigan asin pigdidisinfect an slaughterhouse gamit an chlorine asin iba pang magkakanigong disinfectants para mabawasan an peligro kan kontaminasyon asin paglakop kan virus.
Padagos an pakikoordinar kan manehamiento sa Department of Agriculture, Municipal Agriculture Office asin National Meat Inspection Service para sa pagmonitor asin tulos na pagresponde sa mga report manungod sa ASF. Pigbabantayan man an paglaog kan mga frozen asin processed pork products ngani na masierto na dae ini hale sa mga lugar na sakop kan restrictions.
Kasabay kaini, nangapudan si Palo sa mga paratinda, meat dealer asin konsumidor na makipagtabangan sa mga pigpapaotob na lakdang asin magin maingat sa pagbakal asin pagpabakal nin mga produktong orig. Dawa ngani may epekto an ASF sa kabuhayan asin supply kan karneng orig, pigduon kan manihamiento na mas importante an mahigot na pag-implementar kan mga protocol ngani na maibitaran an paglakop kan helang asin mamantenir an seguridad kan publiko.
