Nagpakol sa haros dae mababa sa 20 pidasong organic na sugok na sana an posibleng ma-produce o ma-haharvest sa ginatos na inaheng manok o katampad kan 30% na produksyon sana sa kada project site kan manukan sa banwaan nin Goa, Camarines Sur, makalihis na maapektaran kan pag-uuran kawsa kan shear line.
Sigun ki Engr. Carlo Palaypayon, Head kan Municipal Agriculture Office kan banwaan, apektado soboot an limang project site kan manukan gikan sa Barangay Tagontong, Lamon, Digdigon, asin duwa pa makalihis na dae talaga nagsusugok an nagkapirang mga manok huli man sa stress na naeksperyensiyahan kawsa kan malipot asin mauran na panahon.
Nagkapira man sa saindang mga suki o consumer posibleng maapektaran huli sa kakadikit na supply.
Sa mismong merkado man kan banwaan dae soboot apektado nin huli ta igwa man pinagkukunan na suplay kun kaya mayong piglalaoman na langkaw-presyo sa sugok.
Sa presente, pighihiling na sa bulan pa kan Marso o depende pa sa magigin panahon piglalaoman an normal na produksyon, nag-iipon kaya nin enerhiya an mga manok tuyong mauran komo proteksyon kaya maluya kun magsugok.
Marurumduman, padagos man an pigsasagibong lakdang kan gobierno tanganing dae na mas orog pang maglangkaw an presyuhan kan sugok sa bilog na nasyon.
