NAGA CITY- Padagos an pigsasagibong inspeksyon kan mga personahe kan Land Transportation Office Bicol sa manlaen-laen na tinampo sa Rehiyon tanganing ipromoter an disiplina sa mga motorista na naggagamit kaini mapa driver man o pasahero.
Sigun ki LTO-5 spokesperson Jamie Roperes, obheto pa kan operasyon na magpokus sa pagdakop sa mga traffic violators, pagpapahigot sa road safety measures, asin pagsierto kan striktong pagsunod sa batas trapiko kan publiko.
Pigtawan duonn man kan opisyal na kabali pa sa saindang mandato an pagsierto na nasusunod an manlaen-laen na ley siring kan Memorandum Circular 2020-2185, Republic Act (RA) 4136 o an Land Transportation and Traffic Code, RA 8750 o an Seatbelt Law, RA 8794 o an Anti-Overloading Act, Anti-Drunk and Drugged Driving Act, Anti-Colorum campaign asin iba pang batas na igwang kinaaraman sa transportasyon.
Importante soboot na nagsusunod digde an mga motorista tanganing malikayan an pagbungkaras kan aksidente sa tinampo.
Marurumduman, enot nang pigsaysay kan PSA na uru-aldaw kadakol an binabawian nin buhay huli sa pagkaka-imbwelto sa aksidente.
Huli kaini kaipuhan na namomonitor an compliance digde kan publiko tanganing ma-assess kun ano pa an dapat na baguhon o gibuhon tanganing magin epektibo an implementasyon.
Mientrastanto, pig-enkaminar man kan opisyal an striktong pagsunod sa batas trapiko asin mga regulasyon komo parte kan kampanya kan LTO Bicol na mabawasan an mga road crash incident asin halion an mga dae salbado asin iligal na transport practices.
Sa ngunyan, hagad na sana ni Roperes an kooperasyon kan publiko para sa kasalbaduhan kan gabos.
