Nagpahayag an Bicolana Gabriela nin makusog na suporta sa pagcoviction ki Bise Presidente Sara Duterte katakod kan impeachment proceedings sa senado.
Sa intrevista kan Bombo Radyo Naga ki Jen Nagrampa (Chairperson, Bicolana Gabriela), sinaysay kaini na kabale sinda sa mga progresibong organisasyon na nagtulod kan impeachment complaint kontra sa bise presidente sa Kongreso.
Segun ki Nagrampa, importante na magtiripon an Senado tangani na ipresentar asin repasuhon an mga ebidensiya kontra ki Duterte.
Pigtawan duon kaini na an boto kan Kongreso para sa impeachment “nakakabigla,” na iyo an rason kan proseso nag-aabante.
Dugang pa kaini, nasa Senado na ngunyan an pagbalik kan tiwala kan publiko sa institusyon sa tahaw kan manlaen-laen na kontrobersiya na kinakahampang kaini.
Pigpaliwanag man kan grupo na dakulang isyu para sa mga kababaihan asin sa banwaan an suboot salang paggamit kan confidential funds asin iba pang alegasyon nin kurapsyon kontra ki Duterte. Segun sa sainda, mantang dakul na mga Pilipino an nasasakitan sa halangkaw na presyo asin kakulangan nin serbisyo sosyal, dae maako an soboot pagsayang kan fondo kan publiko.
Mientrastanto, pig-anunsyo ni Bicolana Gabriela na makikoordinar sinda sa iba pang women’s groups, youth organizations, asin mga progresibong sektor sa Bikol tanganing magkaigwa nin mga forum, educational discussions, asin iba pang aksyon durante kan impeachment trial. Kabale sa saindang mga pangapodan iyo an “Sara litisin, Bato arestuhin,” may kinaaraman man sa isyu laban ki Senador Ronald “Bato” dela Rosa.
Nangapudan si Nagrampa sa mga senador na magin patas asin tugutan na mangibabaw an katotoohan sa paglilitis.
Sinabi pa kaini na dai dapat mangibabaw an interes kan mga pulitiko kundi an karahayan kan mga tawo asin paninimbagan sa gobyerno.
Tinawan duon kaini na dapat ipahiling kan Senado na kaya kaining i-uphold an accountability asin hustisya para sa namamanwaan Pilipino.
