Aram baya nindo mga ka-bombo, sarong aki sa Shanghai, China an posibleng dae matawan nin birth certificate asin scheduled para sa vaccinations sarong taon makalihis an saiyang pagkamundag huli ta an saiyang mga magurang dae nagkasundo sa saiyang pangaran.
Susog sa Pudong New Area People’s Court sa Shanghai, kasuarin sana igwa sindang nabaretaan dapit sa diborsyo kan mag-agom na kun saen an rason an huli sa dae magkasundo sa ipapangaran sa saindang aking lalaki.
An kada lado igwang pigbubusol na pangaran sa omboy asin dae nagtinauhan sa kada saro.
Igwang ebidensiya sa korte na nagpapahiling na magkasuhay na nagpasiring sa ospital an mag-agom tanganing iparehistro an saindang aki alagad an parehas na pagpurbar an dae tinugutan huli sa dae pagsunod sa regulasyon.
Pigtawan duon man kan korte na an birth medical certificate an importanteng basehan para sa mga bagong mundag na omboy tanganing magkaigwa nin legal identity.
Enkaso an mga magurang pigpahaloy an proseso huli sa personal na conflicts sinda an igwang paninimbagan digde.
Sa ngunyan, liwat na nagpagirumdom an korte sa mga magurang na dae paggamiton an mga aki sa personal na pig-aagihan huli ta maapektaran an saindang futuro.
