Mas pinakusog pa kan kapulisa kan Magarao Camarines Sur an saindang kampanya kontra sa krimen partikular sa mga kaso kan panhahabon na saro sa mga problema kan banwaan.
Kaayon sa mga lakdang na ginigibo kan pulisya an mas mahigot na pagpautob kan pulis visibility asin tulos na aksyon sa mga insidente. Sigon ki PSSG Lea T. Carascal, isinasagibo an mas pinahigot na information drive asin pag ikot sa mga barangay tanganing makipagkoordinar sa mga residente asin ipaaram an mga paagi kan pag iwas sa krimen.
Dagdag pa kan opisyal na pig iinkaminar an publiko na tulos na ireport sa pulisya an mga kaninahinalang aktibidad sa saindang lugar. Mientrastanto, padagos man an koordinasyon kan pulisya sa mga Barangay Officials tanganing mas marikas an pagsimbag sa anuman na insidente.
Pigsierto kan mga otoridad na an mga suspek sa krimen tulos na nasasangatan kaso tanganing mamantiner an katrangkiluhan kan komunidad. Sa paagi kan pinakusog na kampanyang ini kan pulisya, naglalaom an mga kapulisan na mababawasan an insidente kan krimen sa banwaan nin Magarao asin masisierto an kaligtasan kan mga residentes sa saindang arualdaw na pamumuhay.
