Handa an Magarao Municipal Police Station (MPS) na maseguro an kaligtasan, kaayusan, asin katoninongan sa maabot na pagromdom kan Undas.
Sa intrevista kan Bombo Radyo ki PCPT Mark Navarroza Spaña, acting chief kan Magarao MPS, sinaysay kaini na 100 porsyento preparado an mga kapulisan na magdeploy nin personnel sa mga kamposanto asin iba pang lugar na piglalaoman na madagsa an mga tawo.
Bilang parte kan preparasyon, pig-inspeksyunan na kan mga pulis an nagkapirang mga barangay para madeterminaran an mga lugar na kaipuhan nin mas mahigot na pagbantay sa panahon kan Undas.
Mag-iimplementar an pulis nin 24 oras na monitoring sa mga kamposanto, siring man an pagdeploy nin mga personahes tanganing mamantenir an orden asin pagresponde sa mga posibleng insidente.
Makikoordinar man an Magarao MPS sa Bureau of Fire Protection (BFP), Municipal Disaster Risk Reduction and Management Office (MDRRMO), Rural Health Unit (RHU), asin mga volunteers bilang parte kan preparasyon para sa Undas.
