Naputol an winning streak ni former WBC Featherweight Champion Mark “Magnifico” Magsayo matapos ining daogon ni Andres Cortes via unanimous decision kan Sabado nin banggi sa T-Mobile Arena.
Iginawad kan tolong judges an parehong 97-93 score ki Cortes matapos kontrolon kan Mexican-American boxer an dakulang parte kan saindang 10-round lightweight na laban.
Naulangan ni Cortes an explosiveness asin makaskas na kombinasyon ni Magsayo sa paaagi kan agresibong pakikipaglaban sa close range. Imbes na tawan nin distansya an dating world champion, padagos kaining pinapiot an laban asin epektibong ginamit an saiyang right hand hale sa manlaen-laen na anggulo.
Bahagyang nakabawi si Magsayo sa huring tolong rounds matapos magkaigwa nin hiwa si Cortes, alagad dae na ini nagin sapat tanganing mabago an resulta.
Huli sa pagkadaog nagbaba an standings ni Magsayo sa 29-3, 19 KOs, mantang nagmamantinir na mayung daog si Cortes sa 26-0, 13 KOs.
An laban ay parte nin Zuffa Boxing event asin importanteng pagkakataon sana para ki Magsayo na pakusugon an saiyang posisyon sa lightweight division asin giraray maparani sa world title contention.
