Pighurot kan Makabayan Bloc na dapat imbestigaran sinda Executive Secretary Lucas Bersamin asin Budget Secretary Amenah Pangandaman katakod kan soboot budget insertion mess kasunod kan pagbanggit sa sainda ni dating Ako Bicol Rep. Zaldy Co.
Hurot kan mga kongresista, dae bastante an pagbubutas kan duwang opisyal asin dapat sindang panimbagon sa ley.
Sigun sa Makabayan, dapat man maiiba sa imbestigasyon sinda Presidential Legislative Liaison Office Undersecretary Adrian Bersamin, DepEd Undersecretary Trygve Olaivar, asin DOJ Undersecretary Jose Cadiz Jr.
Hurot pa kan mga lehislador na dapat man maimbestigaran mismo si Presidente Marcos Jr., orog na ta an nagbutas na executive secretary an “alter ego” kaini.
Naenot na mang inako kan Presidente an pagbutas ninda Bersamin asin Pangandaman komo delicadeza sa tahaw kan imbestigasyon sa soboot anomalya sa flood control projects.
Itinalaga si Finance Secretary Ralph Recto komo bagong executive secretary, mantang si Budger Undersecretary Rolando Toledo an magigin OIC kan DBM.
Nag-ugat an isyu sa budget insertions sa iniluwas na video statement ni Co kun saen ibinunyag kaining ipinagsugo soboot kan Presidente an pagsingit kan P100 bilyong kantidad sa 2025 national budget asin nakaresebir pa soboot nin kickbacks.
