Aram baya nindo mga ka-Bombo, nalikayan an sarong posibleng malagim na trahedaya sa India kan biglang nawaran nin pagmangno an driver kan sarong pampasaherong bus mantang nagamamaneho.
Bigla soboot kaya na nakamate nin kulog sa daghan an driver kan bus, na dae naghaloy natumba na sa saiyang pigtutukawan.
Nagpadagos pa man an pag-andar kan bus hasta sa mahiling na an konduktor an nagpwesto sa driver’s seat.
Pigkontrol kaini an manibela hasta sa dagusan na nagpundo an bus.
Makalihis kaini, pig-alalayan an driver na mayong pagmangno asin nagtabang na man an ibang pasahero.
Sa pigluwas na report, pigdara kan konduktor sa ospital an nasambitan ng driver alagad dae na naisalbar an saiyang buhay.
Pig-atake soboot sa puso an driver na si Kran Kumar mantang nagmamaneho.
Nagpaabot man nin pakikidumamay an pamayuhan kan bus company asin nagtao nin tabang sa nawalat na kaparientes ni Kumar.
Dae naman pigpapaluwas an eksaktong numero kan mga pasahero na lunad kan bus kan mangyari an insidente alagad sa kamarhayang boot, salbado gabos ini.
Mientrastanto, nakaguno man nin paghanga sa mga tawo an marekas na aksiyon kan konduktor na pigbistong si Obalesh na nagin rason tanganing malikayan an posibleng sarong malalang trahedya.
