Inapod ni Palace Press Officer Undersecretary Claire Castro na kwestiyonable asin mayong bastanteng basehan an pigkonsiderar na “Cabral Lists” o an soboot DPWH leaks na pigkokonektad sa sarong P100 milyong infrastructure projects na pigsasabing konektado ki First Lady Liza Araneta Marcos.
Sigun ki Castro, mayong anumang patunay na an mga dokumentong naglalakop an tunay na gikan sa Department of Public Works and Highways (DPWH).
Sa sarong mensahe, sinaysay ni Castro na hasta dae malinaw asin nabeberipika an mga dokumento gikan mismo sa DPWH, dae ini pwedeng tawan nin anumang importansiya.
Dugang pa kan opisyal, an nasambitan ng mga dokumento an maikokonsiderar sana na hearsay asin posibleng mga gibo-gibo o peke. Nilinaw man kaini na mayong makapagsasabi sa ngunyan kun an sinasabing proyekto aktuwal na naipautob.
Simbag ini ni Castro makalihis na magluwas an bareta na nagsasabing igwang dokumentong nakua soboot na naglalaog nin sarong P100 milyong infrastructure projects na nakalista sa irarom kan Department of Public Works and Highways sa prosopwestong 2025 National Expenditure Program.
Naglitaw man sa dokumento an kategoryang “OP” na igwang anotasyong “Care of First Lady Liza Araneta Marcos with request letter from District Representative Faustino Inno Dy”.
Pigtawan-duon ni Castro na importanteng magsunod sa tamang proseso asin berepikasyon antes magluwas nin paratang, orog na kun imbwelto an halangkaw na opisyal kan gobyerno.
