Pighurot kan Malakanyang na dae kaini uulangan an anuman na imbestigasyon na maimbwelto sa nagkapirang cabinet officials sa kontrobersiyal na insertions o pagsisingit sa 2025 budget kan Department of Public Works and Highways (DPWH).
Liwat na pig-utro ni Presidential Communications Office (PCO) Undersecretary asin Palace Press Officer Claire Castro na ‘no sacred cows’ sa imbestigasyon.
Naenot digde, napabareta na pigbuyagyag ni Senate Pro Tempore Panfilo Lacson na igwang dae mababa sa limang cabinet secretary asin nagkapirang undersecretary an igwang allocables asin non-allocables sa 2025 national budget, na nag-aabot sa soboot bilyon-bilyong piso.
Sigun ki Lacson, basado sa dokumentong gikan sa kampo ni dating Department of Public Works and Highways (DPWH) Undersecretary Maria Catalina Cabral asin gikan mismo sa DPWH, kaibahan sa igwang allocables si dating DPWH Secretary Manuel Bonoan asin saro soboot na “ES”.
Sigun pa ki Lacson, igwang bilyon-bilyong allocables man para sa House Leadership asin nagkapirang party-list groups.
Siring man, saro pang miyembro kan gabinete apwera ki Bonoan an nakinabang sa kickback, basado sa pahayag ni dating DPWH Usec. Roberto Bernardo na naghatod soboot nin kwarta sa opisyal.
Sinaysay man kan senador na posibleng imbitaran an mga opisyal sa imbestigasyon kan Senate Blue Ribbon Committee kun na-authenticate na an mga dokumento, kaibahan an mga Special Allotment Release Orders (SARO) na igwang petsang Disyembre 27, 2024.
Pigpapahiling soboot kan mga dokumento gikan sa kampo ni Cabral na igwang kinaaraman an mga SARO sa pagpapaluwas kan P50 bilyong unprogrammed appropriations, kun saen P30 bilyon an para sa flood control projects, asin kadakol sa mga ini an napatunayang “ghost projects”.
Antes bawian nin buhay, inihayag man soboot ni Cabral na preparado ining magtestigo dapit sa mga SARO.Alagad sigun ki Lacson, pwedeng ipa-authenticate an mga dokumento ki Budget Officer-in-Charge Rolando Toledo o sa DPWH mismo.
