NAGA CITY- Pig-implementar na sa mga empleyado kan Naga City partikularmente sa mga nasa City Hall an CSC prescribes revised dress code para sa mga goverment workers.
Sa entrevista kan Bombo Radyo Naga ki Anselmo Maño, Acting Human Resource kan Naga City Hall, sinaysay kaini na nakapalaog sa nasambitan ng kasuguan na kaipuhan magsulot kan ASEAN asin Filipiniana inspired na kasulutan an mga empleyado kun saen ini an tuyong aldaw nin Lunes sa kada bulan.
Boot sabihon, sa sarong bulan an enot na Lunes an para sa mga traditional na outfit kan pagtaraid na nasyon kan Pilipinas mantang an huring tolong Lunes an Filipiniana inspired attire.
Sigun ki Maño, tanganing makasunod an mga empleyado kan City hall sa mandato kan Civil Service Commission, amay soboot na pig-release an Uniform allowance na nagkakanted nin P7,000.
Katakod digde, tanganing ma-monitor an compliance kan mga empleyado, an mga Department Heads an pigsugo na magbantay asin mag-check kun nagsusunod an saindang mga pag-iriba sa Departamento.
Pigtawan duon kan opisyal na an siisay man na dae magsunod sa kasuguan, mahahampang sa magkakanigong standard sanctions susog sa mandato kan Civil Service Commission.
Sa ngunyan, maogma man na pigheras ni Maño na haros gabos na empleyado kan City hall an nagsusunod sa kasuguan kan CSC.
