Nagkasimbagan sinda Senator Rodante Marcoleta asin Department of Justice (DOJ) Secretary Jesus Crispin Remulla katakod kan urulay sa “restitution” o pagbuwelta kan hinabon sa maanomalyang flood control projects, tanganing makabali sa Witness Protection Programn (WPP).
Enot nagluwas an urulay sa irarom kan WPP sa nagkapirang resource person na pigsalang sa pagdangog kan Senado huli sa huma sa saindang seguridad kaiba na an mag-agom na government contractor na sinda Curlee asin Sarah Discaya na nagheras soboot sa “kickback” na proyekto.
Sa pagpapadagos kan imbestigasyon sa Senate Blue Ribbon Committee sa maanomalyang flood control projects ngunyan na Martes, Setyembre 23, pigbuyagyag giraray ni Sen. Marcoleta an napag-ulayan sa nakalihis na pagdangog kan komite mapadapit sa restitution na dae requisite o kondisyon tanganing makaiba sa programa, alagad pigsimbag ini ni Sec. Remulla na mayo soboot ini sa ley.
Pigpaliwanag kan sekretaryo na dae parte kan restitution komo requirements para sa admission kan WPP, bagay na pig-uyunan man ni Marcoleta.
Mantang, pigtawan duon kan DOJ chief na dae boot sabihon dae na ninda ikokonsiderar huli ta nakadepende ini sa kaso.
Sigun man ki Marcoleta na igwang proseso kun saen dae requisite an restitution para sa aplikasyon kan WPP, mantang sigun ki Sec. Remulla, ini sarong krimen kontra sa financial status kan mga namamanwaang Pilipino kun kaya tama lang na hagadon ini.
Digde na kinuwestyon ni Marcoleta si Remulla kan pagpurbar na amyendaran an probisyon kan ley na tulos man pigpahimutikan ni DOJ chief.
