Nanindugan an Malacañang na habo ni Presidente Ferdinand Marcos Jr., na magpaluwas nin siisay man na diplomatiko sa nasyon sa ibong kan kontrobersyal na pahayag ni Chinese Ambassador Jing Quan.
Segun ki Palace press officer Claire Castro, iginagalang kan Presidente an opinyon kan nagkapirang senador asin kongresista na ideklara si Jing na persona non grata huli sa suboot pagbanta sa Pilipinas. Alagad, si Marcos mantenidong nanindugan na an anuman na isyu dapat resolberan sa paagi nin diplomatic channels.
Pinaapod ni Foreign Affairs Secretary Ma. Theresa Lazaro an embahador tanganing ipaabot an protesta kan Pilipinas kontra sa saiyang mga pahayag na inapod niyang probokatibo asin dai maako. Pigtawan-duon kan Department of Foreign Affairs na bakong maninigo para sa sarong foreign diplomat na magtuyaw sa publiko an mga opisyales kan Pilipinas sa paggibo kan saindang trabaho.
Sa ibong kan tensyon, nakatalaan man giraray na magbisita si Marcos sa China sa masunod na bulan para sa Asia-Pacific Economic Cooperation (APEC) Summit. Sinabi ni Castro na an katuyuhan kan Presidente iyo an mamantenir an dayalogo sa mga lider kan China mantang padagos na pigdedepensahan an mga deretso asin teritoryo kan Pilipinas, kabali na an West Philippine Sea.
Mientrastanto, nangangapudan an Federation of Filipino-Chinese Chambers of Commerce and Industry Inc. na magin maingat an gobyerno sa pag-imponer nin mga sanksyon ki Jing huli posibleng magbalos an China asin maapektaran an ekonomiya kan nasyon. Sa ibong na lado, si Senator Erwin Tulfo nagsangat nin Senate Resolution 739 na naghahagad sa DFA na irekomendar an pagdeklarar kan embahador na persona non grata bilang kasimbagan sa saiyang mga pahayag.
