Mayong espesyal na arrangement na itatao ki Davao City Mayor Sebastian “Baste” Duterte sa saiyang pagluwas bilang testigo sa impeachment trial kan saiyang tugang na si Vice President Sara Duterte, segun sa Senate Impeachment Court.
Sinabi ni impeachment court spokesperson Atty. Reginald Tongol na pwedeng gamiton ni Baste an holding room na nakatagama para sa bise presidente kun gusto niya, mantang pwede man siyang maghalat sa ordinaryong lugar kun sain naghahalat an mga testigo kan saindang pagpatawag sa laog kan Senado.
Segun ki Tongol, parte sana ini kan ordinaryong proseso sa impeachment proceedings asin bakong sarong espesyal na pribilehiyo para sa alkalde.
Inatasan kan impeachment court si Mayor Duterte na magluwas bilang prosecution witness sa Setyembre 28 o 29.
Piglalaoman na hapotan siya manungod sa mga transaksyon sa pagultanan kan gobyerno kan Davao City asin GenCorp Industries, sarong kumpanyang idineklara ni VP Sara bilang business interest sa saiyang Statements of Assets, Liabilities and Net Worth (SALN).
Inatasan man an alkalde na magdara nin mga opisyal na rekord asin kontrata poon 2020 sagkod sa presente na may koneksyon sa mga transaksyon kan City Hall sa GenCorp asin sa arin man na entity na nagmamay-sadiri o nagpapadalagan nin sanga kan Jollibee.
Nagin parte kan impeachment complaints laban sa bise presidente an GenCorp matapos ideklara ni Sara an saiyang interes sa kumpanya sa saiyang SALN.
Si Mayor Duterte kabali sa mga testigong tinukoy kan House prosecution panel manungod sa mga alegasyon sa Article II kan impeachment complaint.
