Antes pang nagyari an insidente nin pananaga sa sarong pulis sa banwaan nin San Jose Partido Camsur, nagsumetir na nin pag-apelar an alkalde kan banwaan nin San Jose kan nakalihis na bulan nin Hulyo, 2026 sa House of Representatives, DSWD asin Legal Community Regious Leaders na magpasar nin sarong ley o tawan nin otorisasyon an Local Executive kan lambang municiplidad na magpagibo nin “Home Care” kun sain saro ining lugar para sa mga tawong may depirensya sa pag-iisip.
Obheto kaining dai na magpaparabaray-basay sa tinampo o kun sain-sain na lugar an mga tawong may deperensya sa pag-iisip huli ta peligroso ini orog na an mga bayolente o nangungulog nin kapwa.
Sa intrevista kan Bombo Radyo Naga ki Mayor Jerold B. Peña, an alkalde kan banwaan nin San Jose dipisil para sa mga kaparientes kan pasyente na darahon an mga ini sa Mental Hospital huli ta kinakaipuhan na igwa ining mabantay na kaparientes digdi.
Apektado an pagbuhay kan pamilya huli ta obligado an mga ini na bantayan an pasyente komo saro sa mga rekisitos kan ospital na saro sa hinihiling na rason kun tano ta dai na sana dinadara sa mental ospital an mga pasyente asin pinapabayaan na sana kan pamilya.
Mas orog pang itutulod kan alkalde an kahurutan na magkaigwa nin pasilidad para sa mga tawong igwa nin mental health issue huli sa nagyaring insidente nin pananaga sa sarong pulis sa San Jose.
Haloy ng plano ini kan alkalde alagad kinakaipuhan nin suporta gikan sa mga lehislador tanganing mayo nin mabalgar sa ley an siisay man na magpautob kaini orog na an pagbalgar sa Derechos Humanos.
