Nadiskubre kan mga residente an pinagtutubudang medical waste sa sakop kan Barangay Laniton kan ika-13 kan bulan nin Abril, na nagtao nin kahandalan sa komunidad.
Sa intrevista kan Bombo Radyo Naga ki Ariel Parica (Barangay Captain, Laniton, Basud, Camarines Norte),sinabi kaini na an mga basura nadiskubre kan aki kan sarong kagawad mantang nagdadaraga sa lugar na dati nang ginibo bilang tapunan nin basura. An nasabing lugar nasa madiklom na parte kan barangay,sa Purok 7.
Sa inisyal na imbestigasyon, may mga ebidensya na nagtutudok na an medical waste hale sa sarong pribadong ospital sa Iriga City. Nabilang sa mga nahale an mga expired na bulong, antibiotic sa sarong saradit na bote, asin iba pang gamit medikal kaiba an mga panturok.
Nagpahayag nin pagkahandal an mga residente, lalo na ta may masangsang na parong an mga narekober na materyales, na nagresulta sa pagkaluya kan sarong opisyal kan barangay na nag-inspeksyon sa lugar.
Tolos na nakipagkoordinar an pamayuhan kan barangay sa Municipal Environment and Natural Resources Office (MENRO) asin Municipal Health Office (MHO) tanganing mahali an mga delikadong basura bago pa man ini magkawsa nin grabeng epekto sa salud asin kapalibutan.
Nagpapadagos pa an imbestigasyon tanganing matukoy kun paano nakaabot sa Basud an nasabing medical waste hale sa Iriga, na medyo harayo sa lugar. Bukod digdi, plano man kan barangay na maglaang nin CCTV asin dugang na ilaw sa lugar tanganing mapugulan an illegal na pag-apon nin basura.
Pangapudan man nis Parica sa mga ospital asin klinika na sundon an tama asin responsableng pag-dispose kan medical waste tanganing malikayan an kaparehong insidente sa masunod na panahon.
Padagos an koordinasyon kan mga otoridad tanganing masiguro an kaligtasan kan publiko asin mapanagot an siisay man na responsable sa insidente.
