Nagsumiter na nin depensa asin counter-affidavit sa Department of Justice an mga aki kan negosyante asin gaming tycoon na si Charlie “Atong” Ang na pig-imbwelto sa kaso kan mga nawawarang sabungero.
Sa saindang kontra-salaysay pigpahimutikan kan mga aki ni Ang an mga alegasyon na imbwelto sinda sa pagkawara kan mga sabungero.
Pigtawan duon kan mga ini na mayong batayan asin mayong ebidensya an mga akusasyon na pigsunad kontra sa sainda kan whistleblower na si Julie “Dondon” Patidongan.
Sigun sa abogado kan magtugang na si Atty. Lorna Kapunan, bigo si Patidongan na maghampang nin bastanteng patotoo sa mga akusasyon asin kulang an testimonya tanganing maikonsederar na may prima facie evidence o bastante na basehan tanganing idagos an kaso.
Bwelta ni Atty Kapunan na pirit na pigdadawit ni Patidongan an pamilya Ang asin saindang mga kairibahan tanganing masalbar an sadiri sa kasong kidnapping na kinakahampang ni Patidongan sa Manila Regional Trial Court.
Si Patidongan an tunay na igwang kinaaraman sa kaso, asin sainda ining papatunayan sa nagpapadagos na preliminary investigation kan DOJ.
Nagtutubod man sinda na mahihiling kan DOJ an kawaran kan basehan kan mga paratang asin sa huri idi-dismiss an kaso.
