Nagbati nin ‘Merry Christmas’ an mga astronaut na nakabase sa International Space Station (ISS).
An grupo an pigbibilog kan mga astronaut na sinda Suni Williams, Nick Hague, Butch Wilmore, asin Don Pettit.
Pigpadara kan grupo nin mga astronaut an saindang recorded message mantang nasa laog kan ISS kun saen manunutaran man an sarong sadit na Christmas tree sa saindang kataid.
Apwera sa pagbati nin ‘Merry Christmas’, pig-istorya man kan mga ini an pira sa saindang kinasasabikang gibuhon kun nag-aabot an kapaskuhan, pagkakan kaini sa space, pira sa mga pinagkaka-abalahan, asin iba pa.
Pigpagiromdom man kan mga astronaut an rason kun tano pigselebrar an pasko sa dakulang parte kan kinaban.
Basado sa National Aeronotics and Space Administration (NASA), nasa katahawan an mga ini kan saindang mission na magtinir asin magtrabaho sa microgravity laboratory sa ISS.
Kaibahan sa saindang misyon an pagbilog kan mga scientific knowledge asin mga bagong teknolohiya na pwedeng magamit kan mga ini.
Kaibahan man sa piggibo kan mga ini an pirang serye kan robotic explanation mission na parte kan Moon and Mars exploration approach kan NASA.
