NAGA CITY- Nagdadakol an mga nadadakop na butas na Ido kan City Veterinary Office sa siyudad nin Naga.
Sa entrevista kan Bombo Radyo Naga ki Dr. Johann Michael Sales, City Veterinarian, sinaysay kaini na kadaklan soboot sa saindang mga narereseber na request an gikan sa Command Center, Facebook page, sa saindang personahe asin sa MY Naga App.
Sigun ki Sales, kaipuhan na marespondehan an siring na mga apod tanganing malikayan an orog na pagkuriyat pa kan rabies sa Naga partikular ta ngunyan na taon nakapagrehistro kan siring na kaso.
Dugang pa kan nasambitan ng doktor na kadakol pa man giraray an basay-basay na mga hayop partikular mga Ido sa nagkapirang areas kan siyudad kabali na an Balatas, Concepcion Pequeña asin iba pa.
An nasambitan ng mga hayop an nagkakawsa nin problema sa komunidad na kaipuhang masimbagan kan LGU-Naga asin kan saindang opisina.
Katakod digde, saro soboot sa mga paagi ninda tanganing mapugulan an pagkuriyat kan rabies iyo an castration alagad ini an nangangaipuhan pa nin budget asin presenteng pighahalat pa kan City Veterinary Office.
Sa ngunyan, liwat man na nangangapudan si Sales sa mga pet owner na magin responsable tanganing malikayan an orog pang paglala kan problema.
