NAGA CITY – Tinawan duon kan sarong abogado na gabos na empleyado na sakop kan labor code an dapat na makaresibe nin 13th month pay.
Sa entrevista kan Bombo Radyo Naga ki Attorney Anna Mari Apples Abarcar, sarong legal counsel, sinaysay kaini na maski nagtrabaho sana nin sarong bulan an sarong empleyado sa sarong kompanya asin maski na dai ini nakaabot nin sarong taon digdi dapat pa man giraray ining makaresibe nin 13th month pay.
Dugang pa kan abogado na an pagtao nin kompensasyon sa 13th month pay dapat sa paagi sana nin kwarta, asin dai pwede an iba pang klase nin pagbayad.
Entitled man soboot gabos nin empleyado sa 13th month pay maski na ini nag-resign o kaya man pighali sa trabaho.
Pwede man ining makua kan mga empleyado na dai nagin maray an paghale sa kompanya o sa saindang dating pinagtatrabahuhan.
An 13th month pay soboot an mandatory asin igwa nin komputasyon sa kun gurano an 13th month pay.
Manunungod man sa pag-terminate sa sarong empleyado, dae soboot pwedeng haleon an nasambitan tulos kan sarong employer, nin huli ta may mga tamang proseso sa labor code sa pagsasagibo kaini.
