POSIBLENG maeksperienciahan kan mga konsumidor sa Nobyembre an pagbaba kan singil huli sa paghale kan 12% value-added tax (VAT) sa allowable system loss charges kan mga power utility.
Segun sa Energy Regulatory Commission (ERC), nakipagpulong na ini sa mga stakeholder kan Biyernes tanganing plantsahon an mga mekanismo para sa pagpapatupad kan bagong patakaran kan Bureau of Internal Revenue (BIR).Sinabi ni ERC Chairperson Francis Saturnino Juan na target ninda na maipatupad an paghale kan VAT sa system loss charge para sa kuryenteng nakonsumo sa bulan kan Oktubre, na mahihiling sa bill na matatanggap kan mga konsumidor sa Nobyembre.
Sa irarom kan Revenue Memorandum Circular No. 97-2026 kan BIR na ipinaluwas kan Setyembre 14, dai na papatawan nin 12% VAT an system loss charges na pasok sa limitasyon na itinakda kan ERC.
Pigkokonsiderar na kan BIR an nasabing singil bilang government-mandated pass-through cost, kaya dai na ini masairarom sa VAT.Mientrastanto, piglinaw kan ERC na VAT sana sa system loss charge an hahaleon asin bako an mismong system loss charge.
An system loss charge nagrerepresentar sa gastos na konektado sa kuryenteng nawawara mantang ipinapadara asin ipinapamahagi ini sa power system.Suway ini sa generation, transmission, asin distribution charges na regular na nahihiling sa electricity bill.
Segun ki Juan, dai pwedeng haleon an VAT sa iba pang parte kan electricity bill huli ta itinatakda ini kan ley.Kinakarkulong nasa P20 sagkod P30 an VAT component kan system loss charge na posibleng mawara sa bill kan mga konsumidor.
Naenot nang sinabi kan Department of Energy (DOE) na posibleng makatipid nin dai mababa sa P20 sa saindang electricity bill an mga household na nagkokonsumo nin haros 200 kilowatt-hours kada bulan kun tulos na maipatupad an pagbabago.
Tinawan -doon kan ERC an padagos kaining pakikipag-ugnayan sa mga stakeholder tanganing masiguro na marhay asin sabay-sabay na maipatupad an bagong patakaran sa mga power utility.
