Aram baya nindo mga ka-bombo, sarong grupo kan mga estudyante sa hig school sa Texas an ipigdemanda huli sa soboot pagpirit sa mga parakawat sa maggibo hasta 368 pushup sa laog kan sarong oras sa sarong makapagal na sesyon kan training na nagbugtak sa saindang buhay sa peligro.
An dating coach kan Rockwall-Heath High School na si John Harrell asin sarong dosenang assistant coach an pigkasuhan kan pagkakaigwa nin mga junior varsity na mga parakawat kan football na naggibo nin haros 400 pushups nin mayong pahingalo asin mayong water break sa sa sarong 50 minutong sesyon nin training, kun saen napasiring sa pagkaka-ospital nin pirang aldaw an mga estudyante.
Sigun sa sarong demanda na pigsunad kan saro sa mga magurang kan mga parakawat, kan nakalihis na ika-6 kan Enero, dose-dosenang mga junior varsity player na naglalaom na makalaog sa varsity team an pigparusahan sa lambang salang naginibo sa saindang 50 minutong sesyon nin training na igwang 16 na pushup.
Igwang 23 na sala an naibilang, kun kaya kaipuhan kaining gibuhon an kabilogang 368 pushups.
Kasunod kan mapagal na pag-eehersisyo, 26 na mga parakawat an na-diagnose o nagkaigwa nin mga sintomas kan rhabdomyolysis, sarong potensiyal na nakakagadan na kondisyong medikal na nagigin kawsa kan pagkaraot kan tissu kan tulak asin paglaog sa bulos kan dugo.
