Nagiging problema para sa kalinigan kan Salog Naga an pagdara kan mga basura sa mga lugar kun saen an mga pamilya nag-eerok sa irarom nin mga tulay, kasabay kan pagkahandal para sa saindang kaligtasan sa panahon nin baha.
Sa intrevista kan Bombo Radyo Naga kay Engr. Joel Martin, SWMO Head, sinabi kaini na igwang mga indibidwal asin pamilya na nag-eerok sa irarom kan mga tulay, kabale na an mga taga Barangay Balatas asin iba pang lugar. Igwa man nin mga residentes na nagkakabuhay sa paagi nin pagkolekta asin pagkolekta nin mga recyclable materials, arog kan asero, na kinukua sa mga lugar sa irarom kan tulay.
Segun ki Martin , haloy nang isyu an presensya kan mga pamilya na nagdadanay sa mga nasambit na lugar. Durante kan administrasyon ni dating Naga City Mayor asin DILG Secretary Jesse Robredo, ginibo an mga lakdang tanganing maibakwit an mga nakaistar sa irarom kan mga tulay. Alagad, sa ibong kaini, may mga pamilya pa man giraray na nagbabalik asin nagdadanay sa mga lugar na ini.
Dugang pa, nagigin delikado an sitwasyon, partikularmente sa panahon nin mga uran asin baha. Posibleng mameligro an buhay kan mga residente, lalo na an mga kaakian, ta posibleng mahulog sa salog o madisgrasya.
An lokal na gobyerno, katuwang kan Department of Social Welfare and Development (DSWD), naggigibo nin espwersos na matabangan an mga apektadong pamilya. Minsan siring, nagigin komplikado an situwasyon huli sa saindang pangangaipo nin kita asin nin permanente asin ligtas na istaran.
Sa lado kan mga ini, nagdadanay na agyat an ciudad sa pagmantenir kan kalinigan kan Salog Naga, pagsierto kan kaligtasan kan mga residentes, asin pagtao nin magkakanigong solusyon sa mga pamilyang nakaistar sa irarom kan mga tulay.
