Ipinaluwas kan United Nation an sarong video footage na nagpapahiling sa mga kaakian sa Gaza City kun pano magsuruksukan at pagpila nin pirang oras para sana sa paghalat nin pagkakan.
Sigun sa UN mayo pang humanitarian aid an pigdestrebwer sa Gaza Strip, duwang aldaw makalihis na tugutan kan Israel na limitaran an paglaog kaini sa paagi kan Kerem Shalom crossing.
Hababa sa 100 na aid trucks an nakakalaog sa Gaza puon kan tugutan ni Prime Minister Benjamin Netanyahu an paghali sa ulang para sa mga humanitarian aid.
Huli sa padagos na air strikes asin tank fire na nagpapalangkaw man sa binabawian nin buhay an mga preskong suplay kan harina asin iba pang basic na pagkakan.
An liwat na pagbungkaras kan opensiba sa Gaza puon pa kan Marso makalihis an duwang bulan na untuk-putukan an padagos na nakakaguno nin kondemnasyon sa manlaen-laen na nasyon na bukas sa kritisismo sa Israel.
Magin an US na saro sa mga kaalyado kan Israel an nagpapahiling naman nin kawaran pasensiya huli sa mga desisyon ni Netanyahu.
Sa ngunyan, an Britain, France asin Canada nagpatanid nin konkretong aksyon kontra sa Israel kun enkaso magpapadagos-dagos pa an opensiba.
