ARAM baya nindo mga ka-Bombo, ipinahiling kan mga katutubo sa Tagkawayan, Quezon an katotoohan sa kasabihang “it’s the thought that counts” sa pagheheras nin regalo.
Maski simple sana kaya an saindang exchange gift na nakasupot sa dahon, mahihiling man an kaogmahan sa saindang mga mukha.
Mahiling sa video na kua ni Jann Santillan, sa pigsagibong munting Christmas party kan mga katutubo sa Barangay Casispalan sa Tagkawayan.
An salu-salo an gibo kan grupong Tagkawayan Vines nin huli ta mawot soboot nindang ipagselebrar an mga biyaya na saindang naresiber asin napili ninda ining gibuhon kaini an mga katutubo.
Sa video, mahihiling man na nakasupot sa dahon an mga regalo na bitbit kan mga katutubo na pang-exchange gift ninda sa kada saro.
Igwa nin numero an kada saro asin an laog kan regalo, mga gulay na saindang mga tanom siring kan papaya, buko, talbos asin iba pa.
Bako man makukulay an mga pamsupot asin bakong mamahalon an laog na regalo, mahihiling man an kaogmahan sa mga katutubo, asin buhay na buhay an diwa kan Pasko.
