Malinaw para ki House Committee on Appropriations Chairman asin Ako Bicol Partylist Representative Zaldy Co na epektibo an mga lakdang kan administrasyon ni Presidente Ferdinand “Bongbong” Marcos Jr. tanganing mapababa an presyo kan mga barakalon.
Sigun ki Co, patunay kaini an inflation rate kan nakalihis na Setyembre na nagpakol sa 1.9% na pinakahababa sa laog kan apat na taon basado sa Philippine Statistics Authority (PSA).
Sigun pa man ki Co, an nagpatatag soboot sa suplay asin presyo kan mga barakalon an marahay na whole-of-government approach kan Marcos administration kaiba an pagtapyas sa taripa sa imported na bagas.
Dugang pa man ni Co an pagprayoridad ni PBBM na makua an seguridad sa pagkakan, masuportaran an mga paraoma, asin mapag-tibay an produksyon sa sektor kan agrikultura.
Mientrastanto, suportado man ni Co an hirit kan National Economic and Development Authority (NEDA) na dugang na pamumuhunan sa agricultural infrastructure tanganing mapahigot an irrigation systems, magkapagtugdok nin bastante na post-harvest facilities, asin matawan nin access an mga paraoma sa de-kalidad na banhi asin modernong teknolohiya.
