NAGA CITY-Pigpagirumduman kan Land Transportation Office (LTO) an mga may kansadiri nin sasakyan na i-update an pagbabago sa ownership kasunod kan nagkapirang road rage killing sa Makati City asin paggadan sa sarong LTO official sa Quezon City.
Sigun ki LTO chief Vigor Mendoza II, importanteng imantinir na updated an mga datos kan sasakyan, orog na enkaso may pagbabago sa pagkakasadiri kaini, tanganing pag may nangyari man na dai piglalaoman, an iimbestigaran kan LTO an may kansadiri na nakarehistro sa database kan LTO.
Malilikayan man igdi an anumang problemang legal enkaso maimbwelto sa road rage asin iba pang krimen. Pigpaliwanag man kan LTO chief na an pangaran na nagluluwas sa registration data kan anumang sasakyan an pigkokonsiderar komo may kansadiri asin driver, na ibig sabihon an nasambitang indibidwal an may pananagutan asin iimbestigaran.
Pig-gibo kan LTO Official an nasambitang patara-tara makalihis na pirang kaso nin motor vehicle owners an pig-isyuhan nin show-cause order o iniimbestigaran kan kapulisan makalihis na an saindang sasakyan na dati nindang pagsasadiri an naimbwelto sa road rage incident o iba pang krimen.
